Image

Receita de Pastel vasco

recetas-pastel-vasco-cocinas-santos-santiago-interiores-02

Queremos compartir convosco a deliciosa receita de Pastel vasco que Santos nos propón para o mes de marzo. Convidámosvos a entrar na vosa cociña e preparar este doce típico do norte do País Vasco. Trátase dunha sobremesa sinxela e moi saborosa, rechea de crema por dentro e crocante por fóra. Apetécevos probala? Aquí tedes os ingredientes e todos os pasos para a elaboración.

Ingredientes

Para a masa:

  • 200 g de manteiga
  • 300 g de fariña
  • 150 g de azucre
  • 60 g de améndoa moída
  • 2 ovos
  • Sal

Para a crema:

  • 400 ml de leite enteiro
  • 1 pau de canela
  • 40 g de azucre
  • 50 g de fariña
  • 2 ovos
  • 50 g de manteiga
  • 1 culleradiña de esencia de vainilla

Preparación

A crema pasteleira:

Elaborar a crema pasteleira en primeiro lugar posto que debe arrefriar para poder usala como recheo.

Poñer nun cazo o leite e a canela. Dar un fervor e deixar repousar uns dez minutos. Coar o leite e metelo de novo no cazo, reservando medio vaso. Nun bol mesturar o medio vaso de leite, a fariña, a vainilla, o azucre e os ovos.

Cando o leite do cazo rompa a ferver, engadir a mestura, removendo coa axuda dunhas varillas e levar de novo a ebulición. Manter ao lume durante un par de minutos e finalmente incorporar a manteiga. Reservar a crema tapada con filme transparente ao nivel.

A masa:

É importante traballar coa manteiga ben fría. Por ese motivo, é recomendable introducila no conxelador media hora antes de empezar a manexala.

Nun bol ancho e aberto colocar a fariña, a améndoa, o azucre, o sal e a manteiga cortada en dadiños. A manteiga, que previamente pasou polo conxelador, debe estar moi fría, pero sen chegar ao momento de conxelación. Coa axuda dun garfo ou un morteiro mesturar todos os ingredientes, sen preocuparnos en exceso de que quede unha masa completamente homoxénea.

Bater os ovos aparte. Unha vez que estean ben batidos, engadilos á mestura anterior e integralos aos poucos ata formar unha masa uniforme. Envolvela en filme transparente e introducila durante 1 hora ou hora e media no frigorífico para que cando se estenda estea, de novo, ben fría.

Sacar a masa da neveira e dividila en tres partes. Unha delas será para tapar o pastel, e as outras dúas para formar a base e os lados. Reservar unha parte na neveira.

Colocar sobre a superficie de traballo unha folla de papel de enfornar e sobre ela os dous terzos de masa que imos estirar. Tapala por encima con outra folla papel e coa axuda dun rodete empezar a darlle forma para facer un círculo duns 5 mm de grosor. Obteremos así a base do pastel.

Colocar a masa estirada sobre un molde redondo duns 18/20 cm (previamente engraxado con aceite) de forma que cubramos a base e os lados. Se a masa rompe ao trasladala non hai problema, podemos recompoñela dentro do molde. Tratar de que o bordo sexa da mesma altura en todo o contorno.

Meter de novo o molde coa masa na neveira uns 10/15 min. Encher coa crema que reservamos e tapar co terzo de masa, previamente estendida, que apartaramos. Selar a tapa á masa base cos dedos de forma que quede ben pechada.

Para acabar pincelar con ovo, debuxar unhas raias coa axuda dun coitelo, e meter no forno prequencido a 180º durante uns 40 min.

Para ver máis imaxes do proceso de elaboración e a presentación final desta receita animámosvos a visitar o blog ToBeGourmet.