Image

Receita de Torta de queixo con glaseado Butterscotch

Receta de Tarta de queso con glaseado Butterscotch | Cocinas Santos | Santiago Interiores

O calendario de Santos quere adozarnos o mes de maio con esta receita de Tarta de queixo con glaseado Butterscotch. Tan bonita como deliciosa, é ideal para ofrecer nunha merenda acompañada cun bo café ou un té.

Á vista destacan as súas dúas liñas cor moka. A de abaixo, de galleta, e a de arriba, feita a base de manteiga e azucre moreno, unha preparación que se coñece como Butterscotch. Ao padal, sorprenderache a súa textura suave e delicada e o contraste entre os seus diferentes sabores. Queres saber como preparala?

Ingredientes

  • 12 galletas tipo digestive
  • 75 g de manteiga
  • 700 g de queixo
  • 120 g de azucre
  • 1 cullerada de esencia de vainilla
  • 3 ovos tamaño L
  • 80 g de noces picadas

Para o Butterscotch

  • 60 g de manteiga
  • 45 g de azucre moreno
  • 2 culleradas de leite enteiro
  • 120 g de azucre glas
  • 1 cullerada de esencia de vainilla

Preparación da torta de queixo:

O primeiro que debemos facer é forrar o molde con papel de forno. Nesta receita utilizouse un molde de aproximadamente 20 cm de diámetro. Para a parte inferior recortamos un círculo, e para o borde usamos unha ou dúas bandas de papel da anchura do alto do molde. Para fixar o papel usamos un pincel lixeiramente mollado en aceite.

A continuación trituramos as galletas e engadimos a manteiga derretida. Mesturamos ata conseguir unha pasta, que colocamos no fondo do molde e prensamos cunha culler. Metémola na neveira e esperamos ata que endureza.

O seguinte paso é bater o queixo co azucre e a esencia de vainilla. Imos engadindo os ovos de un en un, e despois incorporamos as noces. Vertemos esta mestura sobre a base de galleta e enfornamos (co forno a 180º e prequentado) durante 45 minutos. Tamén podemos pinchar cunha agulla longa. Saberemos que a torta está lista cando a agulla saia limpa.

Preparación do glaseado Butterscotch:

Poñemos a manteiga, o azucre moreno (que previamente pulverizamos coa axuda dun robot) e o leite nun cazo e levamos a ebulición. Despois apartamos do lume e engadimos o azucre glas e a esencia de vainilla. Removemos cunhas varillas ata que conseguimos unha suave crema.

Cando a torta estea fría, incorporamos por riba o glaseado. Volvemos deixar arrefriar; o ideal sería incluso dun día para o outro.

Desmoldamos e empratamos. O papel de forno produce uns pregos nos laterais da torta que lle dan un aire rústico e caseiro. Para redondear a presentación, podemos engadir un detalle floral.

Convidámoste a visitar o blog ToBeGourmet para ver imaxes do proceso de elaboración e a presentación final desta receita. Bo proveito!