Image

Receita de Lentellas verdes con col, cabaza e ovo mollet

Receta de Lentejas verdes con col, calabaza y huevo mollet | Cocinas Santos | Santiago Interiores

Estreamos ano e con el  o novo calendario de cociñas Santos. Nesta ocasión a marca seleccionou 12 propostas do blog gastronómico Sweet & Sour, creadas e fotografadas pola súa editora, Virginia Martín. Mes a mes iremos compartindo aquí, no blog, ademais de nas nosas redes sociais, estes deliciosos pratos. Tralos excesos de Nadal e coas baixas temperaturas de xaneiro, a receita para este mes non nos pode parecer máis oportuna: lentellas verdes con col, cabaza e ovo mollet. Un prato de culler san e reconfortante para combater o frío!

A col rizada, que ultimamente se puxo de moda como kale, é unha verdura moi nutritiva, con baixo aporte calórico e con moitas propiedades. É fonte de fibra, ácido fólico, proteína, ferro… O mesmo podemos dicir das legumes. Se ademais o acompañamos cunha proteína como o ovo, obteremos un prato redondo e moi completo.

Outra das particularidades desta receita é que se prepara coa variedade de lentella verde de Puy, que os franceses cualifican de caviar vexetal. No caso de non atopalas, sempre podemos substituílas por lentella pardina.

Anímaste a preparalas?

Ingredientes (para 4 racións)

  • 300 gr. de lentellas verdes de Puy
  • 2 toros de xenxibre
  • 1 estrela de anís
  • Auga
  • 4 ramas de col rizada sen talos e picadas finas
  • 1 cabaza butternut de 1 kg. aproximadamente
  • Aceite de oliva virxe extra
  • Sal e pementa moída ao momento
  • 1 ceboliña
  • 1 bulbo de fiúncho picado moi fino
  • 4 ovos
  • 1 ramiña de perexil

Preparación

O primeiro que debemos facer e prequentar o forno a 210º con calor arriba e abaixo.

Despois cortamos a cabaza  butternut pola metade e quitamos os fíos e as sementes coa axuda dunha culler. Cun pincel, aplicamos aceite de oliva na polpa. Colocámola nunha fonte refractaria cun dedo de auga, coa polpa cara arriba. Asamos durante uns 30 ou 40 minutos, ou ben ata que vexamos que ao introducir a punta do coitelo non ofrece resistencia. Unha vez lista, retirámola do forno e deixamos arrefriar.

Lavamos as lentellas baixo o chorro da auga da billa. A continuación, cocémolas en auga con dous toros de xenxibre fresco e a estrela de anís. Botamos sal e pementa. Unha vez ferva, deixamos cocer a lume medio durante uns 20 minutos. Como referencia, deben quedar tenras pero enteiras. Cando queden 10 minutos de cocción, incorporamos as follas de col rizada. Previamente picámolas e retiramos o talo.

Picamos moi fino a ceboliña e o bulbo de fiúncho e pochamos cun chorriño de aceite de oliva nunha tixola. Unha vez listo o sofrito, incorporámolo ás lentellas.

Só nos queda preparar os ovos mollet. Cocémolos en auga fría. Non debemos botar os ovos coa auga quente, pois a diferencia de temperatura pode producir que se rompan. Aos 5 minutos de que ferva a auga retirámolos e arrefriamos baixo o chorro de auga da billa para frear a cocción. Xa podemos pelalos. Ao abrilos, a clara estará feita e a xema semilíquida.

Para rematar, servimos as lentellas cunhas cuñas de cabaza asada e o ovo mollet. Engadimos un pouco de perexil e un chorriño de aceite de oliva.

Se queres ver máis imaxes do proceso de elaboración desta receita, podes facelo no blog Sweet & Sour. Esperamos que goces preparándoa e degustándoa!