Sen ideas para cear? Cunha despensa ben provista sempre hai unha solución. E a que nos propón o calendario Santos para o mes de xuño é orixinal e moi doada de facer: bocadillo agridoce de sardiñas. Unha lata de conservas, un sofrito de cebola con piñóns e pasas, uns limóns confitados e un pouco de mel farán a maxia. Soa ben, verdade?
As receitas con produtos en conserva son unha boa idea para aqueles días nos que temos que improvisar unha cea ou comida, e buscamos opcións rápidas, sas e ricas.
O toque exótico deste proposta está nos limóns confitados á sal, un condimento típico da cociña marroquí e da gastronomía do Norte de África.
Ingredientes
- ½ limón confitado á sal, ou a reladura de 1 limón
- 1 ramallete de perexil picado
- 1 cebola vermella grande
- 5 culleradas de aceite
- 70 gr. de piñóns
- 70 gr. de pasas
- 12 sardiñas en aceite grandes
- Sal e pementa moída
- 2 culleradas de mel de loureiro
- Rúcula
- 6 bolos de pan
Preparación do recheo de sardiñas agridoce
Nunha tixola, incorporamos o aceite e rustrimos a cebola vermella picada en dadiños moi pequenos. Durante uns 8 minutos cociñamos a lume medio-baixo.
A continuación, subimos o lume e agregamos os piñóns. Deixamos que se torren durante uns 4 minutos.
Mentres tanto, abrimos o limón confitado e extraemos a súa polpa. Picámola en dadiños pequenos. Mesturamos a polpa (ou a reladura de limón) coas pasas. Levamos o lume a temperatura media-baixa de novo e incorporamos os limóns confitados e as pasas á tixola.
Esmagamos un pouco as sardiñas cun garfo e introducímolas na tixola. Mesturamos ben todos os ingredientes. Por último, engadimos as dúas culleradas de mel e removemos. Refogamos durante uns minutos.
Retiramos do lume, engadimos o perexil picado e reservamos nunha cunca.
A montaxe do bocadillo
Co noso recheo xa listo, só nos queda a presentación final. Abrimos o pan pola metade e torrámolo na tixola na que preparamos o recheo. Farémolo durante uns minutos, a lume alto, polo lado da miga. Así conseguiremos que trisque e quede máis zumento. Ademais absorberá parte dos sabores que quedan na tixola.
Incorporamos unha capa de follas de rúcula picada, que co seu toque forte aportarán un interesante contrapunto ao recheo agridoce.
Engadimos unhas culleradas de recheo e cubrimos coa outra metade de pan.
Para os nosos bocadillos, podemos mercar un pan de hamburguesa ou, se nos apetece enfornar e realizar unha receita máis elaborada, preparar o que propoñemos a continuación, con sementes. Irresistible!
Ingredientes para os bolos de pan (6 bolos de 140 gr. aproximadamente)
- 500 gr. de fariña de panadería
- 6 gr. de lévedo fresco ou 2 gr. de lévedo seco
- 10 gr. de sal
- 300 ml de auga tépeda
- 35 gr. de manteiga abrandada
- 1 ovo (para pintar os pans)
- 1 cullerada de leite (para pintar os pans)
- Para decorar: sementes de sésamo, sementes de papoula, sementes de cabaza
Preparación dos bolos de pan
Nunha cunca grande, mesturamos a fariña peneirada co lévedo fresco fretándoa entre as mans. Engadimos sal e mesturamos.
Imos incorporando a agua suavemente, sen deixar de remover. Mesturamos ata obter unha masa.
Continuamos removendo e engadimos, pouco a pouco, a manteiga, cortada en pequenos anacos. Mesturamos ata que a masa absorba toda a manteiga.
Durante uns 15 minutos, amasamos. Tras este tempo realizamos a proba da membrana. Cortamos un anaco de masa do tamaño dunha noz. Collémola entre os dedos e estiramos cara afora, co obxectivo de conseguir unha fina película. Estiramos pouco a pouco. Se a preparación está correctamente amasada, poderemos realizar este proceso sen dificultade, e sen romper a masa, que adquire a similitude dun veo ou dunha membrana translúcida.
Se vemos que a masa non pasa a proba, deixamos repousar uns 10 minutos e realizamos un amasado duns 2 minutos.
Damos forma de bolo á masa e deixámola toda a noite na neveira, nunha cunca lixeiramente aceitada e cuberta cun pano de algodón.
Ao día seguinte, retiramos a masa do frigo 20 minutos antes para que se vaia temperando. Realizamos 6 porcións duns 140 gr. Dámoslles forma de bolo e aplanamos un pouco coa man, para que no crezan moito. Deixámolas levedar, cubertas e a temperatura ambiente, durante uns 45-60 minutos.
Mentres tanto, imos prequentando o forno a 210º con calor arriba e abaixo.
Cando falten entre 10 e 15 minutos para que finalice o levedado, metemos na parte baixa do forno un recipiente refractario con auga quente.
Se queremos que os pans conserven unha cor abrancazada, pintámolos con auga. Se os preferimos dourados, coa xema dun ovo con leite.
Cubrimos coas sementes da nosa elección e introducimos no forno durante uns 18-20 minutos. Tralos primeiros 10 minutos, retiramos do forno o recipiente con agua.
Cando vexamos que os boliños estean feitos, sacámolos e deixamos arrefriar sobre unha grella.
Os nosos bocadillos xa están listos e só nos queda gozalos. Nunha relaxante cea, nun pícnic campestre ou á beira do mar. Ti elixes! Se queres ver máis imaxes do proceso de elaboración, podes facelo no blog Sweet & Sour. Para consultar outras receitas publicadas no noso blog, fai clic aquí.