Este ano 2021 celebramos o 25 aniversario da apertura de Santiago Interiores. Un cuarto de século no que desenvolvemos incontables proxectos de cociña e interiorismo, todos eles cunha historia única e persoal detrás. Imos contarvos a protagonizada por María del Carmen e Silvia, nai e filla, ámbalas dúas usuarias de cociñas Santos deseñadas polo noso estudio.
Corría o ano 1998, e María del Carmen Rodríguez atopábase inmersa no proceso de reforma do seu fogar, unha vivenda unifamiliar situada no campo. Daquela xa era afeccionada ao programa televisivo do cociñeiro Karlos Arguiñano, e véndoo perfilou unha imaxe da súa nova cociña. Reservou un amplo espazo da planta para ela, e quería dotala dun equipamento acorde co carácter rústico da casa, sen esquecer as comodidades e funcionalidades ofrecidas polas tendencias en deseño do momento. Foi entón cando entraron en xogo o arquitecto e o aparellador que estaban a cargo da reforma: eles explicáronlle as virtudes das cociñas Santos, e tamén lle aconsellaron visitar Santiago Interiores para descubrilas de primeira man. Así o fixo, e encantáronlle tanto os mobles como o trato recibido.
José Luis Miramontes, fundador do estudio, púxose á fronte do proxecto. Visitou a casa de María del Carmen para coñecer o espazo, escoitou e analizou as súas necesidades, ofreceulle ideas para lograr o mellor resultado e, finalmente, deseñou a cociña que ela desexaba, práctica, cómoda e á súa medida. A cociña, instalada no ano 1999, combinaba os deseños ÉPOCA Duna TE y SHAKER Pradairo Coñac de Santos, co mobiliario distribuído en forma de U para facilitar as tarefas e minimizar os desprazamentos. Así, incluía un amoblamento central con vertedoiro e fornos en columna, máis dous laterais para acoller as zonas de cocción, preparación e fregado. Ademais, incorporaba un office e unha barra para almorzos acaroada a un murete. Os acabados en madeira e crema,xunto co toque rústico aportado polo granito do mesado, axudaban a conformar un ambiente de inspiración tradicionalcun marcado espírito caseño.
María del Carmen está convencida de que aquela decisión foi todo un acerto. A cociña non só lle ofreceu todo o que agardaba, senón que se conserva practicamente como o primeiro día, malia estar sometida a unha gran carga de traballo: «Sempre estiven moi contenta con ela, e sigo a gozala decote. É unha cociña moi vivida». Por se cabía algunha dúbida ao respecto das súas palabras, sorpréndenos cuns materiais que garda como ouro en pano. En primeiro lugar, móstranos os deseños orixinais da súa cociña. Como era habitual na época, trátase de ilustracións trazadas e coloreadas a man, unha obra de artesanía coidadosamente detallada que, máis alá de limitarse a expor a disposición dos mobles, busca transmitir a atmosfera da estancia.
A continuación descúbrenos outro tesouro do que se sinte especialmente orgullosa: un exemplar do número 97 da revista «Cocinas y Baños», editado no ano 2000 e moi ben conservado, que inclúe unha reportaxe dedicada á súa cociña. No artigo saliéntase, entre outros aspectos do proxecto, que «a calidez da madeira, a elegancia do aceiro e a viveza da azul confiren a esta dependencia unha personalidade acolledora». Cando repasa estas páxinas con imaxes da súa casa e da súa cociña, nótase que volve a ela toda a ilusión daqueles tempos.
Mais a historia non remata aquí porque, 20 anos despois, a súa filla Silvia tamén opta polo noso estudio para deseñar a cociña Santos da súa nova casa. E, cando lle preguntamos se a experiencia da súa nai influíu nesta decisión, asinte sen dubidalo nin un intre: «Influíu, e moito. Como puidestes comprobar, a miña nai sempre se sentiu satisfeita coa atención e co deseño da súa cociña. Ademais, fun usuaria desa cociña durante anos, e a miña propia experiencia tamén me animou a acudir a Santiago Interiores para que deseñasen a miña».
Mesmo se dúas décadas separan ámbalas dúas cociñas, os que formamos parte de Santiago Interiores seguimos identificándonos plenamente coas dúas. En todo este tempo puideron cambiar moitas cousas, desde as persoas aos deseños, os procedementos, os materiais ou os acabados, pero a nosa filosofía tense mantido inalterable.
De esquerda a dereita, o actual equipo de Santiago Interiores: Sonsoles Cabana, Emma López, Lucía Martínez e Francisco Moreno.Abrimos as portas da tenda en 1996, convencidos de que o noso obxectivo o sería facer realidade os soños dos nosos clientes, e hoxe esta idea mantense máis viva que nunca. Por iso, casos como o de María del Carmen e Silvia resúltannos especialmente emotivos e estimulantes. Recibir aos fillos e fillas de quen confiaron en nós durante aqueles primeiros pasos, que conviviron coas cociñas que creamos para os seus pais e que, agora, tamén acoden a nós para encargarnos a súa, reafírmanos en que entón eliximos o camiño axeitado.
