As cociñas brancas e grises permiten unir a sofisticación e profundidade dos tons escuros coa luminosidade e a sinxeleza dos claros. Non é estraño que esta combinación estea de plena tendencia!
Trátase de dúas cores neutras que, ao complementárense, logran superar as súas carencias creando espazos elegantes, harmónicos e equilibrados. Unha mestura de cores que nunca falla, ideal para estancias de estilo contemporáneo pero tamén para outras máis tradicionais ou antigas. Á fin e ao cabo, as posibilidades son múltiples: mobles en ámbalas dúas tonalidades, mobles grises con mesado branco, mobles brancos con mesado gris, presenza predominante de unha das cores e pequenos detalles na outra… sen esquecer que dentro da cor gris hai desde tons claros como o Gris Area a outros moi escuros como o Antracita ou o Grafeno, e as sensacións que transmiten son moi diferentes.
Se buscas inspiración para a túa cociña branca e gris, animámoste a botar un ollo ás seguintes fotos e ideas.
Cociña branca e mesado gris: unha combinación clásica e atemporal
As cociñas con mobles brancos dan maior luminosidade á estancia, e tamén contribúen a ampliala visualmente; ademais, son fáciles de limpar e facilitan a decoración, xa que quedan ben con calquera outra cor. Se optas por mobles de liñas sinxelas, como os que vemos na foto superior, lógrase crear un estilo minimalista e contemporáneo moi atractivo.
Nestes casos, o mesado gris permite xerar un pequeno contraste que aporta carácter e minimiza o risco dunha atmosfera excesivamente aséptica ou impersoal. Se ademais do mesado, a cor gris esténdese ao panel parede, este efecto faise máis evidente, e o resultado é elegante e actual.
Mesados en cor gris hai moitísimos: de pedra natural, laminados, porcelánicos, de resina… e tamén de aceiro inoxidable. Estes últimos son os máis empregados na cociña profesional, ao seren moi resistentes e hixiénicos, e poden ser unha opción axeitada se se quere dar certo toque industrial ao fogar.
Cociña branca e gris pequena: predominancia dos tons claros
No caso das estancias pequenas, a cor branca adoita ser a gran protagonista nos mobles, deixando a gris para outros elementos, como por exemplo, o mesado e o panel parede. Pero ademais, é preferible decantarse polas tonalidades máis claras da cor gris, que axudan a crear certo contraste, pero sen restar un ápice de luz.
Cociña branca, gris e madeira: cálida e acolledora
Ao ser tanto a branca como a gris cores neutras, ás veces apónselles certa frialdade. Para combater este efecto, nada como introducir pinceladas de madeira: un mesado, un panel parede, unha mesa ou mesmo un chan poden resultar moi útiles para converteren unha cociña simplemente funcional noutra realmente confortable. Na foto vemos ademais que combinar distintos mobles de cociña grises e brancos aporta versatilidade e personalidade, resultando todo un acerto.
Nin sequera é necesario que a madeira estea presente en gran número de elementos. Na imaxe anterior podemos comprobar como unha mesa de comedor grande, rústica e de madeira natural logra dotar de calidez ao ambiente. Convén salientar que, neste caso, a cor gris atópase no mesado pero tamén, en distintos tons, en teito e chan.
Cociñas grises con mesado branco: espazos con moito estilo
Cando temos unha estancia ampla e luminosa paga a pena ceder o protagonismo á cor gris, incluso en tons fortes como o Antracita. Na fotografía superior podemos ver un proxecto no que os mobles aportan volume e carácter, mentres que a tonalidade clara de paredes, teito, portas, vitrina e mesados potencia a luminosidade natural da estancia. O resultado é unha cociña branca e gris singular e repleta de encanto en todos os seus recantos.
Cociña branca e gris con illa: cómoda e elegante
Volvemos confirmar que os tons escuros poden ser unha moi boa idea en espazos amplos, especialmente se son abertos e/ou moi luminosos. A distribución en illa minimiza a presenza de obstáculos para a circulación da luz, e crea estancias moi cómodas e liviás, nas que varias persoas poden traballar á vez arredor da illa sen molestarse. Decantarse por un mesado en cor branca contribúe a esa sensación de lixeireza e luminosidade, ao quedar a cor branca nunha zona superior, contrastando coa cor gris escura dos mobles.
No caso dunha cociña branca e gris clara, en lugar de dar protagonismo ao contraste cómpre potenciar a luminosidade, algo fundamental en estancias máis pequenas. Un bo exemplo vémolo na cociña con península da foto anterior, na que a cor gris serve para romper sutilmente cun ambiente monocromático, pero sen perder claridade nin ateigar visualmente o espazo.
Se estás pensando en reformar a túa cociña e gustaríache probar cun deseño en cores branca e gris, non dubides en pedir cita co noso equipo de interioristas. Estaremos encantados de axudarte a conseguir un proxecto adaptado aos teus gustos e necesidades! Animámoste a visitar tamén o noso post sobre cociñas grises para atopar máis ideas sobre esta cor tan de tendencia.
