Elixir a distribución é unha das decisións máis importantes á hora de amoblar unha cociña. En paralelo, lineal, con forma de L, de U, con illa ou península … as posibilidades son numerosas e a clave para acertar está en ter en conta o tamaño e características da estancia, ademais dos gustos e hábitos dos seus usuarios.
Non hai, polo tanto, solucións máxicas que sirvan para todos os casos, pero si é certo que as cociñas en paralelo, nas que o mobiliario se distribúe en dúas filas enfrontadas, son unha das opcións máis empregadas nas estancias longas e estreitas. Ao aproveitar as dúas paredes máis amplas para poñer os mobles conséguese maximizar o espazo horizontal, o que permite unha zona de traballo cómoda, plenamente equipada e con gran capacidade de almacenaxe.
Do mesmo xeito, é unha distribución idónea cando unha cociña conta con dúas portas, ou abre a outras zonas da casa, así como cando se desexa transformar un espazo de paso nunha cociña funcional e moderna.
Cociñas pequenas en paralelo: un triángulo de traballo moi cómodo
Como diciamos, nas cociñas pequenas e rectangulares é moi frecuente colocar o mobiliario en dous frontes paralelos, pero é imprescindible ter en conta que fai falla un mínimo de 120 cm entre eles para poder deambular e traballar comodamente. Se iso se cumpre, lógrase crear unha zona de traballo confortable e na que todo se atopa a man.
Ademais, no caso de cociñas de dimensións moi reducidas, ou con pouca luz natural, pode xerarse certa sensación claustrofóbica se non se coida moito a iluminación, polo que é importante evitar sombras e zonas escuras. Outras recomendacións para alixeirar visualmente o ambiente pasan por elixir mobles estilizados, en cores claras e con zonas abertas na parte superior.
Do mesmo xeito, en espazos que se abren nun dos laterais tamén se atenúa esa sensación de pechado, permitindo a conexión con outras estancias da casa como o salón ou o comedor, e facilitando a comunicación con familiares e amigos mentres prepárase a comida.
Cociñas grandes en paralelo: con espazo libre no centro
Pero esta distribución pode dar tamén moito xogo en estancias máis grandes, nas que o espazo central, que queda libre, pódese empregar para poñer unha mesa de comedor con cadeiras. Agora ben, hai que ter en conta que se a distancia entre os dous frontes é excesiva, perderase funcionalidade ao quedar as tres zonas de traballo (cocción, auga e almacenaxe) demasiado afastadas.
Nese sentido, é moito máis habitual elixir esta distribución en cociñas grandes rectangulares, mentres que nas cadradas resulta máis funcional unha distribución en U ou con illa.
Cociñas en paralelo con barra ou zona de comedor
Cando a cociña é moi alongada, pódese empregar parte dun dos laterais para poñer unha mesa contra a parede, ou unha práctica repisa para almorzar. Así, as cociñas con barra permiten incluir unha pequena, pero moi funcional, zona de comedor na que tomar algo en calquera momento do día. Se a estancia é máis cadrada, sen embargo, é mellor utilizar a parede que queda libre para este fin.
Deseños de cociñas en paralelo en zonas de paso
En ocasións, a cociña funciona tamén como unha zona de paso entre a entrada da casa e o resto da vivenda (especialmente en estudos e pisos pequenos), ou conta con dúas portas (ao comunicar coa terraza ou o lavadoiro, por exemplo). Nestes casos, a distribución en dous frontes resulta moi práctica, xa que se saca partido de ambos lados da estancia e déixase libre o espazo central para poder moverse comodamente sen obstáculos de ningún tipo.
Así, dun lado pódense situar a zona de cocción e o vertedoiro (separados por un mínimo de 50 cm) e enfronte, a de electrodomésticos como o forno ou o frigorífico, ou os mobles da despensa. Se ademais van encastados, como na imaxe superior, conséguese alixeirar aínda máis o ambiente.
Se estás buscando un deseño en paralelo para o teu fogar, animámoste a consultarnos. En Santiago Interiores estaremos encantados de asesorarte para que saques o máximo partido da túa cociña, realizando un proxecto personalizado que se adapte ás túas necesidades e gustos. Reserva a túa cita aquí!
