Como decorar a casa polo Nadal? Cando se achegan as festas, todas as vivendas se engalanan: abetos cheos de bólas, coidados beléns, grilandas de luces, coroas nas portas, traballos manuais de Papá Noel polos recantos… Todos queremos dar un aire máxico aos nosos fogares, e para logralo, hai múltiples posibilidades.
Entre todas elas, seleccionamos hoxe algunhas propostas baseadas nas decoracións que Rebeca Senra preparou para o noso showroom e que agardamos vos sirvan para imaxinar novos ambientes cos que seguir sorprendendo a familia e amigos ano tras ano.
Decorar a cociña polo Nadal: as plantas son esenciais
Cada vez mais, a cociña está a se converter no centro da vivenda. Se antes era habitual que esta peza se limitase á zona de batalla na que se amoreaban potas, tixolas e fontes mentres se preparaba o menú, hoxe é frecuente que a cociña se abra aos espazos de lecer, e que sexa un lugar máis de reunión e convivencia. Por iso non hai por que deixar esta estancia á marxe da decoración do Nadal.
Evidentemente, non é cuestión de entorpecer o mesado con adornos ou pór a árbore entre o vertedoiro e a placa, pero hai pequenos detalles que levarán o espírito do Nadaldun xeito máis discreto e natural. Así conseguirase unha cociña festiva, e ademais, práctica.
Unha boa opción para logralo é a través das plantas, cunha flor de Pascua, un vaso con visgo ou acevo ou un centro floral en tons vermellos e verdes.
Decorar o salón no Nadal: un toque de cor
O salón, pola contra, adoita ser a estancia na que máis se coida a decoración do Nadal, presidida por un gran piñeiro ou abeto coa súa alfombra, enfeitado con moito detalle. Adoitase adornar ademais o resto da estancia con grilandas, centros de Nadal ou luces.
Cada vez máis, iso si, lévase o Nadal minimalista, con árbores en versión mini ou mesmo substituíndo o clásico abeto ou piñeiro por outras plantas menos voluminosas.
Verbo das cores, verde, vermella, dourada e branca adoitan estar moi presentes na decoración dun salón do Nadal. Nin sequera é necesario elixir adornos con motivos claramente destas datas, como poden ser os reis magos, as criaturas do bosque ou as paisaxes nevadas. Simplemente usando diferentes elementos nos tons antes mencionados, xa se logra xerar unha atmosfera especial, agradable tamén para aqueles que non gozan tanto do espírito do Nadal.
Decorar a entrada de casa no Nadal: máis alá da clásica coroa
A entrada é o primeiro que se ve ao chegar a unha casa, por iso é recomendable colocar algúns adornos do Nadal nesta parte do fogar. Así, nada máis abrir a porta poderemos sentir a calor das festas. A nosa recomendación é que a decoración do hall sexa unha extensión da do resto da casa, mantendo o mesmo estilo e gama cromática.
Cando se conta con algún moble ou aparador, adoita funcionar moi ben algún centro de Nadal, xa sexa con plantas, ou con, por exemplo, pólas secas, piñas e festóns. A inspiración natural nunca falla! Ademais, incluír unha grilanda de luces engadirá un extra de calidez.
Se isto resulta escaso, outros adornos típicos para a entrada son as caixiñas de música ou as bolas de neve, e por suposto, na parte externa da porta, unha coroa de Nadal. Aínda que con unha simple poliña de acevo nun vaso, ou unha cesta con piñas, xa se logra un toque máxico e entrañable.
Decorar a mesa do Nadal: ideas para unha velada inesquecible
Se hai un espazo no que realmente transcorre o Nadal é no comedor. As reunións familiares para comer ou cear caracterizan estas datas, e os anfitrións buscan adornos orixinales cos que sorprender aos comensais.
O ano pasado compartimos algunhas ideas para lograr unha mesa de Nadal acolledora e elegante. Nesta ocasión, quedámonos cunha recomendación clave: non poden faltar os centros de mesa. En Santiago Interiores poderás ver algunhas propostas moi naturais, nas que as velas e o acevo son os grandes protagonistas.
Por suposto, hai que decorar a mesa cando está posta, pero tamén se pode aproveitar a superficie cando non é hora de comer, deixando un centro como o que vemos na seguinte imaxe.
Decorar outros recantos da casa
Os corredores e escaleiras, os dormitorios e baños, a cheminea… calquera recanto da casa pode ser axeitado para crear un espazo de Nadal. Un bo exemplo vémolo na foto superior onde a cor vermella traza o nexo de unión entre distintos adornos, plantas e algo tan básico como unha caixa de regalo. Lógrase así unha decoración sinxela pero, ao mesmo tempo, con moito encanto.
Sen esquecer os elementos exteriores como a fachada, o balcón ou as fiestras. Neste último caso a iluminación xoga un papel esencial para que a decoración do Nadal brille en todo o seu esplendor. Colocar grilandas de luces na parte de fóra da casa axuda a levar o espírito festivo moito máis lonxe.
Como decorar unha árbore de Nadal?
Se falamos de adornos para a árbore de Nadal, cada vez hai máis variedade. Ás clásicas bolas, estrelas e figuras, súmanse agora outro tipo de ornamentos en materiais como a madeira, o cartón ou a tea. Sen esquecer os traballos manuais, desde as fáciles que poden traer os nenos do cole, ata as máis elaboradas, solo aptas para os milmañas da familia. Ao fin e ao cabo, parte da gracia dos adornos do Nadal é que sexan únicos e personalizados para cada fogar.
Agora ben, á hora de buscar un resultado sofisticado, é mellor cinguirse á consigna de menos é máis. Por exemplo, escollendo adornos nunha mesma gama cromática, como vemos na foto superior.
Con estas imaxes do noso showroom agardamos axudarvos a inspirarvos para decorar a casa no Nadal dun xeito sinxelo e elegante, pero sobre todo, é a nosa forma de desexarvos unhas moi felices festas.
