Refrescantes, nutritivos e cheos de sabor, os smoothies son unha forma deliciosa de incorporar máis froita á dieta diaria. Unha opción apetecible para comezar o día con enerxía, e para gozar dunha merenda saudable, para beber entre horas ou para facer fronte ás noites de calor. O calendario Santos para o mes de maio propón un batido de froitas tan exquisito como fácil de facer: o smoothie de amorodos e grosellas.
Aínda que a priori poida dar pereza, preparar esta bebida non leva máis de cinco minutos, e o resultado non só é riquísimo, senón que ademais está repleto de vitaminas. Por outro lado, unha vez feito aguanta ben un par de días na neveira. Como preparar este batido de froitos vermellos?
Ingredientes
- 1 kg de amorodos
- 250 g de grosellas
- 12 culleradas de azucre
- 1 vaso de xeos
- 1 ramallete de menta
Preparación
Comezamos lavando ben a froita; retirando as follas dos amorodos e partíndoos en anacos, e separando as grosellas para quedarnos só coas boliñas.
Colocamos a froita no vaso do batedor, xunto co azucre, as folliñas de menta e o xeo (sempre e cando o batedor sexa apto para picalo, se non é así, substituímos o xeo por 250 ml de auga). Batemos ata que a textura da mestura sexa cremosa e lixeira.
Listo para servir!
Encantarache se…
-
- Es fan dos froitos vermellos
- Buscas un almorzo diferente, san e sofisticado, co que darte un capricho de fin de semana (ou de día laboral)
- Exploras novos xeitos de incorporar a froita á dieta de nenos reticentes a probala
- Tes invitados en casa e queres ofrecer algo que vaia máis alá do té ou o café, pero que non sexa moi complicado nin leve moito tempo
- Necesitas unha receita hidratante e refrescante, ideal para levar á praia ou para combater as altas temperaturas na oficina
- Encantanche os zumes, pero preferirías unha alternativa máis saudable (e coa que, ademais, non se estrague tanta froita)
- Tes amorodos xa maduros na despensa que poderías aproveitar
- Desexas innovar e probar novas mesturas de sabores
Agardamos que te animes a probar este smoothie de amorodos e grosellas agora que empezan a subir as temperaturas. Trátase dunha receita da estilista gastronómica Beatriz Rodríguez, en cuxo blog ToBeGourmet poderás descubrir moitas outras propostas tentadoras.
