Unha cociña aberta na que gozar da fin de semana

A planta baixa acolle unha zona de día aberta e diáfana, formada por cociña, comedor e salón. Trátase dunha estancia con numerosas fiestras que permiten a entrada da luz en practicamente calquera momento do día. A luminosidade natural do ambiente refórzase cunha paleta cromática con predominio de tons claros como o branco ou o crema, con puntuais notas de madeira que aportan equilibrio e calidez.

O interiorismo austero e contido favorece a liberdade de movementos e a interacción entre os usuarios. Así, é posible cociñar mentres se está a leriar cos invitados, alargar a sobremesa vendo o neto xogar no salón, ou recoller comodamente cando xa termina a xuntanza.

Na cociña atopamos a mesma gama de cores que no resto da zona de día. Optamos por un mobiliario de liñas puras e sinxelas en acabado Branco Seff. As frontes lisas e sen tirador do modelo FINE non só aportan beleza e discreción, senón que ademais facilitan a fusión dos mobles coa arquitectura da vivenda, algo esencial en espazos abertos.

Os mobles brancos combínanse cunha barra, un panel parede e un panel con baldas en Olmo Claro, o que contribúe a crear un ambiente máis cálido e acolledor, no que a área de traballo se converte nun lugar tan confortable como o salón.

Organizamos a cociña en forma de U arredor dunha illa central. Esta conta cunha ampla superficie de mesado destinada na súa totalidade á preparación dos pratos. Ademais, ofrece abundante espazo de almacenamento grazas a dous módulos con caixóns na parte interna e dous baixos de servizo na externa.

A ela anéxase unha mesa con dous tallos, onde o matrimonio pode reunirse para almorzar ou tomar un petisco sen necesidade de cambiar de estancia, contemplando a marabillosa paisaxe que rodea a casa.

En paralelo á illa, un lineal de mobles baixos acolle a área de lavado, estratexicamente situada baixo unha fiestra para poder fregar gozando das vistas. Inclúe un lavalouza integrado, un moble portavertedoiro e tres baixos de servizo. A continuación dispuxemos o frigorífico e o conxelador.

Á esquerda, un armario columna integra forno e microondas, xunto a unha composición de mobles altos e baixos onde se sitúa a área de cocción.

Por último, á dereita, dous mobles baixos funcionan a modo de aparador, servindo de transición entre a cociña e o resto da zona de día. Enriba, un panel con baldas ofrece espazo para exhibir a vaixela ou pequenos artigos de decoración. Conta ademais cunha zona adicional de traballo, moi útil para preparar o almorzo e empregar pequenos electrodomésticos, grazas ao perfil de iluminación LED con tomas de corrente.

Con esta planificación logramos crear un ambiente cómodo, práctico, totalmente equipado e que cumpre cos requisitos dos propietarios, que poden compartir tarefas e momentos de ocio nunha cociña deseñada á súa medida.