Espazos diáfanos para gozar en familia

Os propietarios, María e Pablo, partiron dunha casa dos pais del, situada fronte á costa, para transformala nunha segunda residencia diáfana, confortable e contemporánea, que se adaptase ás súas necesidades e preferencias. Para logralo, tiveron que afrontar unha reforma integral, desenvolvida polo irmán de María, o arquitecto Jorge Álvarez Sánchez. Bo coñecedor dos desexos da parella, formulou unha ampliación que contemplou de xeito especial a súa adaptación á privilexiada contorna, ademais de incluír novos servizos para facela máis cómoda e funcional.

Trala intervención, a vivenda divídese en dúas zonas ben equipadas e organizadas: unha pública con cociña, comedor e salón, definida polos espazos diáfanos, abertos e conectados, e outra privada con dúas suites, dous dormitorios e un aseo. A maiores, conta con xardín, terraza cuberta, grellada e piscina.

A cociña, situada nunha espazosa estancia de 40 metros cadrados, conéctase co resto da zona de día, pero tamén co exterior grazas ás amplas fiestras, que proporcionan abundante luz natural e permiten cociñar, comer ou leriar con vistas ao mar ou á terraza. Unha porta corrediza acristalada separa a cociña dun comedor exterior, posibilitando crear un único ambiente cando se desexa comer ao aire libre.

Para amoblala, optamos por un deseño de liñas puras e sinxelas, en consonancia co estilo funcional e contemporáneo da vivenda. A equilibrada combinación de negro e madeira, enmarcada por cristaleiras e tabiques brancos que a realzan, confírelle unha elegancia que resulta, ao mesmo tempo, cálida e acolledora, xerando unha atmosfera serena e moi agradable.

Pensada como un núcleo de convivencia, organizamos a cociña derredor da illa e a barra. A primeira acolle a zona de lavado e tamén incorpora múltiples opcións de organización e traballo en ámbalas dúas caras: moble de caixóns, lavalouza integrado e moble portavertedoiro con caldeiros de reciclaxe na interior, máis tres módulos baixos con estantes e sistema de apertura asistida na exterior.

Anexo á illa dispuxemos unha impresionante barra en acabado Carballo Rústico Sincro que, complementada con catro tallos, funciona como comedor de cotío.

Detrás da illa proxectamos un lineal de mobiliario que acolle as áreas de cocción e frío, incluíndo dous módulos portaplaca, un armario columna portafornos, outro portafrigorífico, e un terceiro armario destinado a gardar útiles de limpeza.

Na zona de cocción optamos por un conxunto de mesado e panel parede de Santos, co mesmo acabado que a barra: Carballo Rústico.

Para completar o amoblamento, equipamos a parede situada fronte á illa cunha composición auxiliar en forma de L, dotándoa de dous mobles de caixóns, unha viñoteca e catro módulos de servizo, un deles aberto e con interior personalizado, igualmente, en acabado Carballo Rústico Sincro.

Como detalle final, nesta zona instalouse unha barra móbil, que ofrece un espazo adicional confortable e versátil para almorzos, petiscos e comidas rápidas.

En conxunto, a cociña destaca polo seu carácter práctico e funcional, facilitando que todo se atope ao alcance da man á hora de elaborar un prato, así como no momento de servilo ou retiralo da mesa.

Todo isto sen esquecer o aspecto estético, xa que os propietarios prestaron especial atención á elección de cada pormenor. Non só no referente ao mobiliario, senón tamén en detalles como os accesorios ou a vaixela, parte dela adquirida na nosa tenda, e que contribúe a dotar de encanto e carácter o día a día na cociña.